На натпреварот за хакери „Google Chrome“ најстабилен

Натпреварот „Pwn2Own“ секоја година ги собира хакерите од целиот свет, кои се трудат во што покус период да ги пронајдат слабостите на најпопуларните Интернет прелистувачи и оперативни системи и да ја тестираат нивната безбедност. Веќе после неколку минути во првиот натпреварувачки ден, тимот кој го сочинуваа Винченцо Јоцо и Ралф-Филип Вајнман успеа да го совлада „iPhone“ и за тој потфат доби награда од 15 000 долари. 

Чарли Милер го „бутна“ „Safari“ на „MacBook Pro“ со оперативен систем „Snow Leopard“, со што трета година по ред победи во оваа категорија на натпреварот, и освои 10 000 долари. 

„Падна“ и „Windows 7“, поточно неговиот безбедносен механизам „Data Execution Prevention (DEP)“, кој беше пробиен од Холанѓанецот Питер Врегденхил. На истиот оперативен систем беше срушена и Мозилата на „Firefox“, од страна на германскиот студент кој се претставува само како Нилс. Од сите Интернет прелистувачи на првиот ден на натпреварувањето несовладлив остана единствено „Chrome“ на „Google“, кој повторно ја покажа својата стабилност и сигурност.

Извор и фото:

Mondo

Милион долари за домејнот www.sex.com

Домејнот www.sex.com оди на аукција. Се очекува интересот да биде огромен, бидејќи пребарувањето со клучен збор „секс“ е едно од најкористените на Интернет. Почетната цена на домејнот ќе биде 1 милон долари, но се очекува конечната цена да биде мошне поголема, посебно ако се знае дека пред три години „DOM Partners“ го кредитираше купувањето на домејнот со неверојатни 14 милиони долари. Сега домејнот оди на продажба од причина што „Escom“, компанијата која го купи, не е во можност да го отплаќа кредитот.

„Facebook“ го надмина „Google Search“ како главен извор на сообраќај за Интернет порталите

Според последниот извештај на „Compete Inc.“, Интернет порталите од типот на „Yahoo“, „MSN“ и „AOL“, добиваат повеќе сообраќај со посредство на социјалните медиуми одошто со посредство на пребарувачите. Конкретно, „Facebook“ го надмина „Google Search“ како главен извор на сообраќај за порталите. Сега се чини мошне појасна намерата на „Google“ со лансирањето на „Buzz“, нели?

Промовиран „Google Buzz“

Она за што наголемо се зборуваше по Мрежата деновиве, конечно се случи. Претставен беше новиот проект на „Google“ – „Google Buzz“, кој има за цел да ги вметне елементите на социјалните мрежи во рамки на „Gmai“l. До крајот на денешниот ден се очекува сите 140 милиони корисници на „Gmail“ да имаат можност да ја пробаат новата социјална алатка на „Google“. Официјалните најави велат дека ќе можете да пишувате статуси по углед на „Twitter“, да ставате слики и видео записи како на „Facebook“, и да ги користите локациските можности по теркот на „GoWalla“ и „Foursquare“.

Интернетот номиниран за Нобелова награда за мир

Интернетот се најде на листата на номинирани за Нобеловата награда за мир за оваа година. Негови конкуренти ќе бидат еден кинески дисидент и еден активист за човековите права од Русија, меѓу останатите.

Номинацијата беше поднесена по петицијата што ја покрена италијанското издание на магазинот „Wired“, а во која се вели дека Интернетот придонел за подобрување на дијалогот, дебатата и консензусот преку комуникацијата. Поднесувачите на номинацијата се надеваат дека таа ќе биде прифатена како легитимна.

Скептиците пак, велат дека по минатогодишниот контроверзен избор на Барак Обама, оваа година комисијата ќе донесе поконзервативна одлука, и нема да ризикува со Интернетот.

Извор:

Mashable

Веб-камера спаси турист во Германија

Туристот кој се загубил шетајќи по замрзнатото море на северот на Германија бил спасен откако блицот на неговиот фотоапарат бил забележан на веб-камера која ја снимала плажата – пишува „BBC“.

Инаку, загубениот турист тргнал со намера да го слика зајдисонцето во местото Сент Петер-Ординг, но се загубил откако почнал да шета по замрзнатото море. За негова среќа, една жена која го гледала зајдисонцето на веб-камерата, од својот дом стотици километри оддалечен од местото на настанот, го забележала светкањето на блицот и ја алармирала полицијата, која набргу го пронашла туристот.

Туристот се изгубил бидејќи во темнината не можел точно да го одреди брегот кој бил покрен со снег.

Извор и фото:

BBC